Monday, 4 February 2013

എന്നു തുടങ്ങുന്നൊരു കവിത



നീറി നീറി എരിഞ്ഞെരിഞ്ഞൊരു കാട്!
നോക്ക്, ഞാന്‍ പറഞ്ഞുവരുന്നത്
നിന്നെക്കുറിച്ചാണ്...
നിന്നെ സ്മരിക്കുമ്പോള്‍
ഓര്‍മ്മയില്‍
തീപിടിക്കുന്ന ഒരു കാടുണ്ടെന്നാണ്!

ഓര്‍മ്മകളുടെ കാട്ടുതീ...
ഹാ! ചിലനേരം
ഒരു വസന്തംതന്നെ
എരിച്ചടക്കാന്‍
ഓര്‍മ്മയുടെ ഒരു നിമിഷം!

ഓര്‍ത്താല്‍ നല്ല തമാശ തന്നെ!

എപ്പോഴാണ്
ശവം അഴുകുന്ന
താഴ്വരകളില്‍ ഞെട്ടിയുണര്‍ന്നത്!?
ഇപ്പോള്‍
സ്വപ്നങ്ങളെല്ലാം
ഏതോ പ്രേത ബാധയുടെ
നഷ്ടസ്മരണകള്‍!

നോക്ക്,
നിന്നെക്കുറിച്ചാണ്
ഞാന്‍ പറയാന്‍ തുടങ്ങിയത്...
'നിന്‍റെ ഒരു ചുംബനം സ്മരിക്കുമ്പോള്‍
ഓര്‍മ്മയില്‍
ഒരു കാടിനു തീപിടിക്കുന്നു'
എന്ന് അവസാനിക്കുന്നോരു കവിതയെക്കുറിച്ച്!

No comments:

Post a Comment

Blogger Widgets